सरकार र सीके राउतबीच आजैबाट लागु हुने गरी गरियो ११ बुँदे सहमति (सहमतिका बुँदासहित)

काठमाडौं, २४ फागुन । सरकार र स्वतन्त्र मधेस गठबन्धनका संयोजक सीके राउतबीच आज ११ बुँदे सहमति भएको छ ।

प्रधानमन्त्री केपी शर्मा ओलीको उपस्थितिमा गृहमन्त्री रामबहादुर थापा बादल र राउतले सहमति पत्रमा हस्ताक्षर गरेका हुन् ।

सहमतिको पहिलो बुँदामा राउतले मुलुकको अखण्डता स्वीकार गरेका छन् भने सरकारले गठबन्धनका कार्यकर्ताहरुमाथि लागेको मुद्दा फिर्ता लिने भएको छ ।

सहमति गरिएको बुँदामा प्रहरी हिरासतमा मृत्यु भएका राममनोहर यादवको परिवारलाई क्षितपूर्ति र परिवारका एक जनालाई रोजगारी दिने उल्लेख छ ।

सहमतिलाई आजै बसेको नेकपा सचिवालय बैठकले अनुमोदन गरेको सचिवालय सदस्य झलनाथ खनालले जानकारी दिएका छन् । सचिवालय बैठकमा प्रधानमन्त्री ओलीले सहमतिबारे ब्रिफिङ गरेका थिए ।

यी हुन् सहमतिका बुँदा

१. मुलुकको स्वाधीनता स्वीकार्ने

२. लोकतान्त्रिक प्रक्रियाबाट समस्या समाधान गर्ने

३. असन्तुष्टि समाधान गर्ने

४. सरकारले सिके राउतको संगठनको मुद्दा फिर्ता लिने

५. सिके राउतको संगठनले निकालेका किताब, गीत तथा अन्य प्रचार सामग्री प्रयोगमा नल्याउने

६. आइन्दा विखण्डनवादी क्रियाकलाप नगर्ने

७. संविधानको भावनाअनुसार राजनीतिक मूलधारमा आउन सक्ने

८. गएको भदौ १५ गते बाँकेमा मारिएका राम मनोहर यादवको परिवारलाई क्षतिपूर्ति र उनका परिवारका सदस्यलाई सरकारले रोजगारीको व्यवस्था गर्ने

९. घाइतेहरुलाई उपचार गर्ने

१०. सिके राउतको संगठनका कार्यकर्तामा भएको सिपलाई राष्ट्रको हितका लागि उपयोग गर्ने

११. सहमति आजैबाट लागू हुने

सरकार र सिके राउतबीच भएको सहमतिमा नेकपा सचिवालय सदस्य बामदेव गौतम र नारायणकाजी श्रेष्ठले भने आपत्ति जनाएका छन् ।