पाकिस्तानमा कोरोना भाइरसबाट २ लाख २५ हजारभन्दा बढी संक्रमित

पाकिस्तानमा कोरोना भाइरस संक्रमितको सङ्ख्या २ लाख २५ हजार २८३ पुगेकोे छ । कोरोना भाइरसको संक्रमणको कारण पाकिस्तानमा शनिबारसम्म ४ हजार ६१९ जनाको मृत्यु भइसकेको छ ।

संक्रमितमध्ये १ लाख २५ हजार ९४ जना भने निको भएका छन् । पाकिस्तानका सिन्ध र पञ्जाव प्रान्त अत्यन्त प्रभावित भएका छन् । सिन्ध प्रान्तमा ९० हजार ७२१ जना संक्रमित भएका छन् । त्यसैगरी पञ्जाब प्रान्तमा ८० हजार ७२१ जनामा कोरोना संक्रमण भएको छ ।

यसैबीच इस्लामाबादमा थप १६३ जनामा कोरोना भाइरस संक्रमण भएको र दुइ जनाको मृत्यु भएको सरकारी स्रोतले जानकारी दिएको छ । पाकिस्तानका विदेशमन्त्री शाह महमूद कुरेशीले शुक्रबार कोभिड १९ परीक्षण गर्नुभएको र पोजेटिभ भएको घोषणा गर्नुभएको छ । उहाँले घरबाटै आफ्नो कर्तव्य पूरा गर्ने निर्णय गर्नुभएको बताइएको छ ।

‘आज दिउँसो मैले हल्का ज्वरो महसुस गरेँ र तुरुन्तै घरबाट अलग भएर बसेको छु । मैले अहिले कोभिड १९ परीक्षण गरिसकेँ, अल्लाहको अनुग्रहले म कडा र ऊर्जावान भएको छु–’ उहाँले भन्नुभएको छ ।