मन्त्रालयबाटै परिवार नियाेजनकाे नाममा ८ करोड बजेट एनजिओलाई बाँड्न चलखेल !

काठमाडौँ , २२ पुस । स्वास्थ्य तथा जनसंख्या मन्त्रालयले परिवार नियोजन स्थायी बन्ध्याकरण कार्यक्रमको नाममा झण्डै आठ करोड बजेट एनजिओलाई बाँड्न चलखेल भएको पाइएको छ ।

महाशाखाले नियमविपरीत गैरसरकारी संस्थालाई बन्ध्याकरणका नाममा रकम बाँड्ने तयारी गरेको विवरण फेला परेको हो ।

घुम्ती सेवाको स्थायी बन्ध्याकरणसहित शिविर सञ्चालनसम्बन्धी विज्ञता भएका संस्थाबाट र दरभाउ रेटपत्र लिई एनजिओलाई बजेट निकासा गर्नेगरी परिवार कल्याण महाशाखाले फाइल अघि बढाएको प्राप्त विवरणबाट प्रस्ट भएको छ ।

स्वास्थ्य सेवा विभागका महानिर्देशकस्तरीय छलफलबाट यस सेवामा विज्ञता भएका संस्थाबाट आशयपत्र अघि बढाउने सुझाव आएको भन्दै मंसिर १४ गते विभागमातहतको परिवार कल्याण महाशाखा प्रमुख डा. आरपी बिच्छाले अघि बढाएको फाइलमा केही एनजिओको निवेदनसमेत समावेश गरिएको पाइएको हो ।