विमान नहुँदा यात्रु अलपत्र ! पैसा तिरेर टिकट लिन युद्ध जिते झैं गर्नुपर्ने बाध्यता

सुर्खेत, २० चैत । पैसा तिरेर टिकट लिन युद्ध जिते झैं गर्नुपर्ने बाध्यताबाट अहिले पनि साविकको कर्णालीमुक्त हुनसकेको छैन । यसको चरम मारमा राष्ट्रिय सडक सञ्जालमा नजोडिएका जिल्ला हुम्ला र डोल्पा छन् ।

विमान नहुँदा यसपटक सयौं हुम्लीवासी सुर्खेत विमानस्थलमा अलपत्र छन् । उपचार एवं विभिन्न कामले राजधानी सुर्खेत झरेका उनीहरुलाई बेलैमा हुम्ला कसरी पुग्ने भन्ने कुरोले पिरोल्न थालेको छ । वर्षेबाली लगाउने बेला चुक्ने हो कि भन्ने कुराले बढी पिरोलेको यात्रु छवि थापाले बताउनुभयो । “उसै त हुम्लामा उत्पादन नै कम हुन्छ,” उहाँले भन्नुभयो, “बाली लगाउने बेला चुक्यो भने भोकमरी पर्ने निश्चित छ ।”

हवाई यातायातको विकल्प नभएको हुम्लाको समस्याप्रति सरकारको चासो नरहेको हुम्ली सेवा समाजका अध्यक्ष कलबहादुर लामाले टिप्पणी गर्नुभयो । “निजी जहाज आफू खुशी चल्छन्,” अध्यक्ष लामाले दुखेसो पोख्नुभयो, “सरकारको जहाजले राजधानी सुर्खेत–हुम्ला सेवा दिदैन ।” उहाँका अनुसार यात्रुलाई प्राथमिकतामा राखेर काम गर्नेगरी यही चैत १८ गते तारा, सीता र समिट विमानका कम्पनीसँग हप्ताको एक दिन यात्रु उडान गर्न सम्झौता गरिएको छ ।

यात्रु जय बुढाले सरकारी जहाँज नहुँदा निजी विमान कम्पनीले टिकट नदिने गरेको बताउनुभयो । गरीबी, पीडा र अविकासमा राज्य आजसम्म गम्भीर नबन्दा झनै पीडा खेप्नु परेको उहाँको दुखेसो थियो । कर्णाली प्रदेशका मुख्यमन्त्री महेन्द्रबहादुर शाहीले प्रदेश सरकारले मन्त्रिपरिषद् बैठकबाट नै नेपाल वायुसेवाको सेवा राजधानी सुर्खेतबाट हुम्लालगायत सबै जिल्लामा दिन सङ्घीय सरकारसँग अनुरोध गर्ने निर्णयगरी पठाएको बताउनुभयो । सडकमार्ग जोडिएका जिल्ला नभइ राजधानी सुर्खेतबाट हवाई यातायात एकमात्र विकल्प भएको जिल्ला हुम्ला जोड्न नेपाल वायुसेवा निगम सम्बन्ध ‘सेतु’ बन्नुपर्नेमा उहाँको जोड छ

। मुख्यमन्त्री शाहीले भन्नुभयो,“यसका विषयमा हामी संस्कृति, पर्यटन तथा नागरिक उड्डयन मन्त्रालयसँग पनि बस्यौं, कहिले पाइलट छैन, कहिले केही छैन भनेर टारियो ।” पटक÷पटकको मन्त्रिपरिषद्को निर्णयले एउटा जहाज भाडामा दिन वा अर्को जहाज किन्ने स्वीकृत प्रदान गर्न सङ्घलाई अनुरोध गर्दा पनि त्यसको सम्बोधन हुन नसकेको उहाँको भनाइ छ ।

नागरिक उड्डयन कार्यालय सु्र्खेतका प्रमुख विनोद पन्तले नेपाल वायुसेवा निगमको जहाज कर्णाली प्रदेशको राजधानी सुर्खेतबाट कुनै पनि जिल्लामा नजोडिएको जानकारी दिनुभयो । “निगमको जहाज चले हुम्ला नागरिकको आधा समस्या हल हुन्छ,” उहाँले भन्नुभयो, “यहाँ सेवा प्रवाह गर्दा निगमलाई पनि घाटा छैन ।” रासस