रोहितकुमार पौडेलको कप्तानीमा यू–१९ क्रिकेट टोली घोषणा

काठमाडौँ, २० चैत । यही चैत २७ गतेदेखि मलेशियामा हुने अन्तर्राष्ट्रिय क्रिकेट काउन्सिल (आइसिसी) यू–१९ विश्वकप एशिया छनोटका लागि रोहितकुमार पौडेलको कप्तानीमा राष्ट्रिय टोली घोषणा गरिएको छ ।

चौध सदस्यीय नेपाली युवा टोलीमा कप्तान रोहितसहित चार खेलाडी भीम सार्की, पवन सर्राफ र सन्दीप जोरा छन् । त्यस्तै रित गौतम, कमलसिंह ऐरी, रासिद खान, सागर ढकाल, अभिषेक बस्नेत, कुशल मल्ल, हरिबहादुर चौहान, प्रतिश जिसी, सूर्य तामाङ रहेको छन् । वैकल्पिक खेलाडीमा लोकेश बम, शेर मल्ल, आकास चन्द र रविकुमार साह छन् ।

त्यस्तै व्यवस्थापकमा रमन सिवाकोटी, मुख्य प्रशिक्षकमा विनोदकुमार दास र फिजियोमा विक्रम न्यौपाने रहेको प्रशिक्षक दासले जानकारी दिनुभयो । प्रतियोगिता खेल्न नेपाल आगामी शनिबार मलेशिया प्रस्थान गर्ने तालिका रहेको छ । नेपालले छनोटको पहिलो खेलमा यही चैत ३० गते संयुक्त अबर इमिरेट्स (युएइ)सँग खेल्नेछ ।

दोस्रो खेलमा आगामी वैशाख २ गते मलेशियासँग, वैशाख ३ गते ओमनसँग र वैशाख ५ गते कुवेतसँग खेल्नेछ । प्रतियागितामा शीर्ष स्थानमा रहने टोली युवा विश्वकपमा छनोट हुनेछ । दक्षिण अफ्रिकामा हुने आइसिसी यू–१९ विश्वकप क्रिकेट प्रतियोगितामा १६ टोलीको सहभागिता रहनेछ । रासस