प्रलेसको प्रदेश अध्यक्षमा थेबा

काठमाडौँ, ९ चैत । वामपन्थी लेखक–साहित्यकारको साझा मोर्चा मानिने प्रगतिशील लेखक सङ्घ (प्रलेस) को प्रदेश नं ३ को प्रथम सम्मेलन मुक्तान थेबाको अध्यक्षतामा नयाँ कार्यसमिति चयन गर्दै सम्पन्न भएको छ ।

कार्यसमितिको उपाध्यक्षमा अनिता लामा र जगत रेग्मी, सचिवमा भीम थापा, सहसचिवमा पुरुषोत्तम आचार्य र कोषाध्यक्षमा शैलेन्द्र अधिकारी चयन हुनुभएको छ । सदस्यमा प्रदेशमा रहेका जिल्लाका अध्यक्ष र अन्य सदस्य रहेका छन् ।

सम्मेलनको उद्घाटन प्रलेसका केन्द्रीय अध्यक्ष मातृका पोखरेलले आन्तरिक एकता बलियो बनेमा प्रतिध्रुवीय पक्षसँग लड्न सकिने भन्दै प्रलेसलाई रुपान्तरण गर्न आफूहरु तत्पर रहेकाले समानान्तर वा बेग्लै संस्थाको बहस चलाइनु अर्थहीन भएको जनाउनुभयो ।

नेपाल कम्युनिष्ट पार्टी (नेकपा) का स्थायी कमिटी सदस्य मणि थापाले साम्राज्यवादको विरुद्ध वर्तमान सरकार र आफ्नो पार्टी लडिरहेकाले लेखकले एकताबद्ध भएर राष्ट्रिय स्वाधीनता र समृद्धिका लागि सघाउनुपर्नेमा जोड दिनुभयो ।

राष्ट्रिय जनसांस्कृतिक महासङ्घका संयोजक खगेन्द्र राई र अध्यक्ष सरल सहयात्रीले विद्यमान अवस्थामा प्रलेसको औचित्य कायम रहले यसलाई सशक्त बनाउन आग्रह गर्नुभयो । सम्मेलनमा प्रलेसका उपाध्यक्षहरु डा बिन्दु शर्मा, रामप्रकाश पुरी, महासचिव आरएम डङ्गोल, सचिव प्रकाश सिलवाल र सचिवालय सदस्य आरसी न्यौपानेलगायतले प्रादेशिक र जिल्ला सम्मेलन तथा अन्य गतिविधिले संस्था क्रियाशील भएको चर्चा गर्नुभएको थियो ।

प्रलेसेको एघारौँ राष्ट्रिय सम्मेलनको पूर्वसन्ध्यामा प्रलेसको प्रदेश र जिल्ला सम्मेलन भएको हो । राष्ट्रिय सम्मेलन यही चैत २२ र २३ गते काठमाडौँमा हुँदैन । मोहन वैद्य नेतृत्वको नेकपा (क्रान्तिकारी माओवादी) निकट अखिल नेपाल जनसांस्कृतिक महासङ्घले वर्तमान स्थितिमा प्रलेससँग सहकार्य गर्न नसकिने भन्दै सम्मेलनमा सहभागी नहुने जनाएको छ । रासस