सुत्केरीलाई एक किलो घ्यू

खस्यौली, १५ पुस | रुपन्देहीमा रहेको एउटा सहकारी संस्थाले शेयर सदस्यको श्रीमती सुत्केरीको भए एक किलो घ्यू र रु २०० को बाल बचत खाता खोल्ने कार्यक्रम शुरु गरेको छ ।

जिल्लाको सैनामैना नगरपालिका–४ स्थित साना किसान कृषि सहकारी संस्था लिमिटेडले यस वर्ष ३२ सुत्केरीलाई सो सुविधा दिएकोे छ । तीन वर्षदेखि लागू भएको कार्यक्रम दुई बच्चा हुँदा मात्रै लागू हुने जनाइएको छ । यस क्षेत्रमा घ्यूको बजार मूल्य प्रतिकिलो रु एक हजार २०० रहेको छ । अहिलेसम्म ९५ जना सुत्केरीले यो सुविधा लिएका छन् । २०३२ सालमा कृषि विकास बैंकले गरीबी न्यूनीकरणका लागि सञ्चालन गरेको साना किसान विकास आयोजना २०५० सालमा स्थानीय सदस्यलाई हस्तान्तरण गरेपछि २०६० सालमा यसको स्थापना भएको बताइएको छ ।

संस्थाका सदस्यको आर्थिक तथा सामाजिक विकासका लागि आधुनिक प्रविधिको माध्यमबाट कृषिलाई व्यावसायीकरण र लघु उद्योग स्थापना गर्दै सदस्यहरूको जीवनस्तर वृद्धि गर्ने परिकल्पना रहेको संस्थाका प्रबन्धक दिनेश घिमिरेले जानकारी दिनुभयो । उहाँले अधिकांश कार्यक्रम कृषि क्षेत्रमा केन्द्रित रहेको उल्लेख गर्दै साना किसान विकास लघु वित्तको सहयोगमा कृषि प्रशिक्षार्थीका रूपमा कृषि क्षेत्रमा प्रविधिको प्रयोग तथा यान्त्रिकीकरणबाट कृषि उत्पादन वृद्धि गर्न १० जनालाई इजरायल पठाइएको बताउनुभयो ।

सैनामैनाका शेयर सदस्य प्रेम घिमिरेले साना किसानका लागि स्थापना भएको संस्थामा सहुलियतपूर्ण र सस्तो ब्याजदर नभएको गुनासो गर्नुभयो । सहकारीले दूध डेरी सञ्चालन, बीउबिजन, भेटेरिनरीसम्बन्धी सेवा र मलखाद बिक्री–वितरण गर्ने विषयलाई प्राथमिकतामा राखेर काम अघि बढाउने समेत प्रस्ताव गरेको छ । शेयर पूँजी रु एक करोड ९१ लाख ८७ हजार ३०० रहेको संस्थामा रु १९ करोड २६ लाख पाँच हजार ८७२ निक्षेप सङ्कलन भएको छ । तीन हजार ५८४ शेयर सदस्य रहेको संस्थाले रु ३१ करोड २१ लख ४६ हजार ३५ लगानी गरेको छ । रासस