विद्युत् प्रसारण लाइन परियोजनाविरुद्ध स्थानीयवासी सङ्घर्षमा

लहान, १२ पुस । भारतसँग विद्युत् व्यापार अघि बढाउने उद्देश्यले नेपाल सरकारद्वारा विस्तार गर्न लागेको ४०० केभी हाइटेन्सन विद्युत् प्रसारण लाइन ढल्केवर–दुहबी परियोजनाविरुद्ध सिरहाका स्थानीयवासी सङ्घर्षमा उत्रेका छन् ।

सरकारले सञ्चालन गरेको नेपाल–भारत विद्युत् प्रसारण तथा व्यापार योजनाका कारण आफूहरु भविष्यमा विस्थापित हुनुको साथै गम्भीर स्वास्थ्य समस्या खेप्नुपर्ने भन्दै स्थानीयपवासीले त्यसविरुद्ध अदालतसम्म पुग्ने चेतावनीसमेत दिएका छन् ।

विद्युत् प्रसारण लाइन विस्तारका लागि धमाधम पोल गाड्ने र तार जडान हुन थालेपछि आक्रोशित बनेका सिरहाको लहान नगरपालिका, धनगढीमाई नगरपालिका र गोलबजार नगरपालिकाको विभिन्न वडाबाट जम्मा भएका स्थानीयवासीले आज सामूहिक रूपमा पत्रकार सम्मेलन गरी तत्काल काम रोक्न माग गरेका हुन् ।

विद्युत् विस्तारको नाममा जग्गाधनीसँग कुनै छलफलै नगरी जबर्जस्ती जग्गा अधिग्रहण गरी काम धमाधम अगाडि बढाएको छ, स्थानीय बासिन्दा तथा प्रतिनिधिसभा सांसद सरिता गिरीले भन्नुभयो, “एकातिर जग्गाधनीसँग कुनै सल्लाह गरिएको छैन, एकै पटक सूचना प्रकाशित गरेर अधिग्रहण गरेको जग्गाको मुआब्जा लिन दबाब दिएको छ भने अर्काेतर्फ बस्ती नजिकै हाइटेन्सन विद्युत् विस्तार गर्दा त्यसबाट उत्पन्न हुने स्वास्थ्य जोखिमका बारेमा कुनै अध्ययन पनि गरिएको छैन ।”

राजमार्ग टाँसिएर विद्युत् लाइन जडान गर्दा यस क्षेत्रको बच्चामा लुकेमियाँ, महिलामा बाँझोपना तथा क्यान्सर हुनसक्ने खतरा साथै कृषि उत्पादनमा समेत ठूलो ह्रास आउने भएकाले आफूहरु चिन्तित बनेको सांसद गिरीले बताउनुभयो । विद्युत् लाइन विस्तारबाट उत्पन्न हुनसक्ने समस्याका बारेमा आफूले ऊर्जामन्त्री वर्षमान पुन, विद्युत् प्राधिकरणका महानिर्देशक कुलमान घिसिङ र विश्व बैंकका पदाधिकारीलाई जानकारी गराइसकेको चर्चा गर्दै सांसद गिरीले मन्त्रीदेखि महानिर्देशकसम्मलाई ध्यानाकर्षण गराउँदा पनि काम नरोकिएकाले अब त्यसविरुद्ध अदालत जाने तयारीमा जुटेको समेत बताउनुभयो ।

बस्ती संरक्षण समाजको प्रदेश अध्यक्षमा दास

नेपाल बसोबास बस्ती संरक्षण समाजको प्रदेश नं २ को आज लहानमा सम्पन्न अधिवेशनले सुभेन्द्रकुमार दासको अध्यक्षतामा १३ सदस्यीय प्रदेश समिति गठन गरेको छ । गठित समितिको उपाध्यक्षमा रामनारायण ठाकुर, सचिवमा बलेन्द्र पासवान, सहसचिवमा मोहनलाल चौहान र कोषाध्यक्षमा नमिता लोहनीलाई चयन गरेको छ ।

समितिको सदस्यमा सुमित्राकुमारी महरा र सरस्वती मण्डललाई चयन गरेको छ भने अन्य सदस्य पछि मनोनयन गरिने समितिका नवनिर्वाचित अध्यक्ष दासले जानकारी दिनुभयो । रासस